Kryetari i Aleancës për Ardhmërinë e Kosovës, Ramush Haradinaj, ka thënë se 1 maji, Dita Ndërkombëtare e Punëtorëve e gjen Kosovës në pozitën më të rëndë në 24 vjetët e fundit.
Ai ka thënë se Qeveria e Kosovës është e fokusuar të grumbullojë para në Thesarin e Shtetit dhe jo në investime kapitale.
“Dita Ndërkombëtare e Punës kësaj here Kosovën e gjen në pozitën më të rëndë në 24 vitet e fundit. Secilën ditë që kalon, vendi ynë është edhe më keq, punëtorët tanë më të diskriminuar, e qeveria edhe më e fjetur. Kryeministri dhe kabineti i tij qeveritar janë të fokusuar më shumë në grumbullimin e parave në thesarin e shtetit se sa në investime kapitale – aty ku hapen vende të reja pune, rriten rrogat dhe zhvillohet shteti”, ka shkruar Haradinaj në Facebook, raporton teve1.info
Ai ka thënë se fuqia punëtore po ikë çdo ditë nga Kosova dhe se vendi rrezikon të mbetët edhe pa pjestarë të sigurisë.
“Fuqia punëtore po ikë çdo ditë, vendi ynë po mbetet pa mjekë, pa inxhinierë, ekonomistë e pa mësimdhënës. Kosova rrezikon me mbet edhe pa pjesëtarë të sigurisë sepse rinia po ikë! Ngritja e çmimit të tatimit në pronë, afatizimet dhe lojërat me pagesa të tatimit, duhet të anulohen dhe të mendohet edhe për qytetarët. Ftoj qeverinë që t’i ngritë pagat në sektorin publik, të gjejë modalitete për rritjen e pagave në sektorin privat, aty ku është goditja më e madhe nga inflacioni, si dhe më e rëndësishmja, të zhbllokojë buxhetin e shtetit”, ka shkruar Haradinaj.
