Ish-kryeministri i Kosovës dhe kryetari i Aleancës për Ardhmërinë e Kosovës (AAK), Ramush Haradinaj, ka njoftuar se, së bashku me deputetët e Aleancës, ka zhvilluar një takim me Ministrin e Deleguar për Çështje Evropiane të Francës, Benjamin Haddad.
Sipas Haradinajt, gjatë takimit u diskutua për zhvillimet aktuale në Kosovë dhe perspektivën evropiane të vendit.
Ai tha se delegacioni i AAK-së shprehu mirënjohje ndaj ministrit Haddad dhe shtetit francez për mbështetjen e vazhdueshme që Franca i ka dhënë Kosovës ndër vite, duke kërkuar që kjo përkrahje të vazhdojë edhe në proceset integruese.
“Kërkuam që mbështetja e Francës të vazhdojë, veçanërisht për kandidaturën e Kosovës për anëtarësim në Këshillin e Evropës, marrjen e statusit të vendit kandidat për në Bashkimin Evropian dhe anëtarësimin në NATO”, ka shkruar Haradinaj.
Ai bëri të ditur se para ministrit francez prezantuan edhe ofertën e AAK-së për krijimin e institucioneve, duke theksuar se gjashtë pikat e programit të tyre i konsiderojnë thelbësore për zhvillimin dhe të ardhmen e Kosovës.
Në fund, Haradinaj vlerësoi rolin e Francës si një nga partnerët më të rëndësishëm të Kosovës, duke theksuar kontributin e saj në rrugëtimin e vendit drejt lirisë, pavarësisë dhe shtetndërtimit.
