Kryetari i Ramush Haradinaj ka njoftuar se ka dorëzuar zyrtarisht në Kuvendin e Kosovës kërkesën për organizimin e një ceremonie përkujtimore në nder të ish-kongresistit amerikan Eliot Engel.
Sipas Haradinajt, përmes kësaj iniciative synohet që institucionet e Kosovës të shprehin mirënjohje për kontributin e jashtëzakonshëm të Engel në mbështetje të lirisë, pavarësisë dhe shtetndërtimit të vendit.
“Eliot Engel ishte një nga zërat më të fuqishëm në momentet më vendimtare të historisë sonë, duke ndihmuar në ndërgjegjësimin dhe mobilizimin e politikës amerikane në përkrahje të kauzës sonë të drejtë”, ka shkruar Haradinaj në Facebook.
Propozimi i dorëzuar përfshin mbajtjen e një seance të veçantë përkujtimore, si dhe krijimin e një çmimi vjetor “Eliot Engel” dhe vendosjen e një memoriali të përhershëm brenda hapësirave të Kuvendit.
Haradinaj ka theksuar se nderimi i miqve të Kosovës është detyrim institucional dhe kombëtar, duke e cilësuar këtë iniciativë si një hap të rëndësishëm për ruajtjen e kujtesës historike dhe forcimin e aleancës së përhershme me Shtetet e Bashkuara të Amerikës.
