Kryetari i Aleancës për Ardhmërinë e Kosovës, Ramush Haradinaj ka kritikuar kabinetin qeveritarë pasi sipas tij, sot në Ditën e Mësuesit ata ishin dashur të jenë në sallë të Kuvendit të Kosovës.
Por sipas Haradinajt, kjo nuk po ndodh në Qeverinë Kurti, madje ai tha “jemi hipokritë ne që rrehim shuplaka për veteranët e arsimit, e në të njëjtën kohë përkrahim ndryshimet ligjore me iu hek vitet kontributdhënëse”.
“Sot në ditën e mësuesit po mungon Qeveria, nuk është këtu edhe pse po mungon në këtë ditë. Ka qenë e udhës me dhënë ndonjë lajm të mirë për mësuesit, për mësimdhënësit që me ardhë pjesëtari i Qeverisë dhe me tregu se çka ka ndërmarrë me përmirësu pozitën e mësimdhënësve, pra nuk ka ndodhë kjo. Jo vetëm kaq, jemi hipokritë ne që rrehim shuplaka për veteranët e arsimit, a në të njëjtën kohë përkrahim ndryshimet ligjore me ju hek vitet kontributdhënëse. Imagjinoni sa hipokritë jemi nuk s’po i përdori fjalë tjera por jemi hipokritë”, tha Haradinaj në foltoren e Kuvendit.
Më tej, i pari i AAK-së tha se po punohet pas shpine me arrogancën e numrave të Qeverisë Kurti ndryshimi i kontratës individuale të mësimdhënësve.
“Me arrogancë punohet pas shpine me ndryshu kontratën individuale, pra me ju cenu të drejtat që i kanë të njohura me ligj mësimdhënësit”, shtoi Haradinaj./teve1.info./
