Kryetari i Aleancës për Ardhmërinë e Kosovës, Ramush Haradinaj është shprehur i bindur se Gjykata Kushtetuese do të reflektojë dhe do të sjellë vendim të duhur për zgjidhjen e ngërçit politik.
Pas dështimit të seancës së 36-të të konstituimit të Kuvendit, Haradinaj ka thënë se janë duke pritur që këto ditë të vijë përgjigja e Kushtetueses për adresimin që ia kanë bërë.
“Shpresojmë se këto ditë do të vijë përgjigjja e Gjykatës Kushtetuese në adresimin që ia kemi bërë pra në një mënyrë po presim..Jemi në ditët e fundit të përgjigjes dhe po shpresojmë se na hap rrugë për të shkuar përpara sepse sikur po e shohim të gjithë gjendja është e keqe. Mendoj është e palogjikshme që me pas të drejtë i njëjti kandidat dhjetëra herë me kandidu, është e drejtë me kandidu ose me nominu por nëse nuk e merr votën jam i bindur se Gjykata do të reflektojë në këtë pjesë, pastaj edhe çështja e procedurës së votimit, pra për dikë që është votuar nuk vlen procedura e votimit tjetër”, ka thënë ai.
I pyetur nëse mendon se do të ndëshkohen partitë politike po të dalin tani në zgjedhje, ai ka thënë se më e keqja është që Kosova po ndëshkohet.
“E shihni si është gjendja me energji edhe plot sfida tjera pra gjendja nuk është e mirë është e vështirë”, ka theksuar Haradinaj.
