Kryetari i Aleancës për Ardhmërinë e Kosovës, Ramush Haradinaj, ka bërë një postim përkujtimor në të cilin ka nderuar figurën e Ekrem Rexhës – Drinit, dëshmorët e Ushtrisë Çlirimtare të Kosovës dhe ngjarjet historike të luftës çlirimtare.
Haradinaj ka vlerësuar Ekrem Rexhën – Drinin si një nga figurat më emblematike të UÇK-së, duke theksuar rolin e tij si udhëheqës dhe vizionar në historinë e luftës për liri.
“Ekrem Rexha – Drini, ishte ndër figurat më emblematike të Ushtrisë Çlirimtare të Kosovës, i cili me aftësitë e tij si udhëheqës dhe vizionar, la gjurmë të pashlyeshme në historinë tonë të lavdishme. I afërt dhe i respektuar nga të gjithë, humbja e tij ishte një goditje e madhe për vendin dhe një dhimbje e thellë për familjen dhe bashkëluftëtarët”, ka shkruar Haradinaj.
Ai ka kujtuar gjithashtu 8 majin dhe sakrificën e banorëve të fshatrave Kashicë, Staradran dhe Terstenik në vitin 1999, duke theksuar rolin e tyre në themelimin e shtetit të Kosovës.
Në postimin e tij, Haradinaj i ka kushtuar vëmendje edhe Betejës së Llapushnikut, të zhvilluar më 8, 9 dhe 10 maj 1998, të cilën e ka cilësuar si një nga betejat më të lavdishme të UÇK-së dhe një kthesë të rëndësishme në luftën frontale.
Ai ka theksuar se kjo betejë kishte rëndësi strategjike, duke ndërprerë një nga arteriet kryesore të furnizimit të forcave armike.
Haradinaj ka përkujtuar me respekt 47 dëshmorët dhe 54 martirët e rënë në këtë betejë, si dhe dëshmorët e martirët e fshatit Lëbushë.
“Gjaku i tyre u bë themel i lirisë sonë, dhe kujtimi për ta do të mbetet i gjallë brez pas brezi. Lavdi të gjithë martirëve dhe dëshmorëve të Kosovës”, ka përfunduar ai.
