Kryetari i AAK-së, Ramush Haradinaj, ka thënë se 24 vjet pas rënies dëshmori i kombit, Ekrem Dili do të prehet në varrezat e dëshmorëve në fshatin Penu të Podujevës.
Haradinaj ka shkruar se më 12 prill të vitit 1999, forcat armike të pozicionuara në Albanik, Batllavë dhe Herticë kishin për qëllim të mposhtnin njësitet e UÇK-së dhe të depërtonin te popullata civile për të kryer plaçkitje, masakrime dhe spastrime etnike.
“Ekremi me shokë të idealit ishin të vendosur të mbrojnë me çdo kusht territorin dhe popullatën e kësaj ane. Pas një beteje heroike, atë ditë, Ekremi bie në altarin e lirisë për të mos vdekur kurrë”, ka shkruar Haradinaj në një postim në Facebook.
Gjithashtu, i pari i AAK-së ka nderuar jetën dhe veprën e veteranit të UÇK-së, Fadil Mehmeti nga fshati Gërgoc të komunës së Gjakovës, i cili ka vdekur pas një sëmundje të rëndë.
“Familjes Mehmeti, bashkëluftëtarëve të Fadilit dhe gjithë atyre që e njohën, iu shpreh ngushëllimet më të sinqerta! Respekti dhe nderimi ndaj gjithë atyre që dhanë gjithçka për lirinë e Kosovës do të jetë i përhershëm!”, ka shkruar tutje në Facebook. /teve1.info/
