‘Qeveri të territ’ e ka quajtur kryetari i Aleancës për Ardhmërinë e Kosovës, Ramush Haradinaj, qeverinë aktuale të Kosovës.
Haradinaj ka thënë se Qeveria Kurti e ka kundërshtuar projektin e kontraktuar të termocentralit “Kosova C” dhe gazin amerikan, ndërsa tani sipas tij fajin për kolapsin energjetik po mundohen ta shkarkojnë te KEDS-i.
“Kjo Qeveria e territ. Ma patën kundërshtuar me krejt fuqinë, projektin e kontraktuar të termocentralit “Kosova C”, që Kosovën e bënte fuqi energjetike, me arsyetimin se çmimi i megavatit prej 80 eurosh, ishte i lartë e sot e paguajnë mesatarisht ka 400 euro. E kundërshtuan gazin amerikan e dolën me bajrak kundër tij. U përfshinë në tregëti të energjisë, deri me GEN-in e Beogradit dhe u vunë në mbrojtje të sekserëve të tyre si Martin Berishaj e Nagip Krasniqi, që kishin shpërdoruar miliona euro të buxhetit të Kosovës. Kur e morën pushtetin, bojshin hajgare me “bojlera e filtera”. Tash kur Kosova është në kolaps energjetik dhe kur pjesa më e madhe e vendit është në terr, mundohen ta shkarkojnë fajin te KEDS-i. E shtrenjtuan rrymën për tri herë e asgjë nuk qiten në dritë. Këta kurrë asgjë nuk qiten në dritë”, ka shkruar Haradinaj në Facebook.
Ndryshe, gjatë javës së fundit, qytetarë të shumtë në komuna të ndryshme raportuan për ndërprerje të rrymës.
Ndalja e energjisë elektrike po thuhet të jetë për arsye të mbingarkesës për shkak të konsumit të lartë të energjisë elektrike nga ana e konsumatorëve në këto kohë, pas motit me temperatura të ulëta.
Korporata Energjetike e Kosovës (KEK) ka thënë se po punon me kapacitete të plota, ndërsa kompania për distribuimin e energjisë elektrike (KEDS) nuk i ka quajtur reduktime, por “mbingarkesa” dhe ka kërkuar nga konsumatorët që të kursejnë maksimalisht rrymën.
