Kryetari i Aleancës për Ardhmërinë e Kosovës, Ramush Haradinaj ka thënë se tensionet në veri janë të papranueshme .
Ai ka thënë se sulmet dhe lëndimet e policëve në veri janë akt i rëndë i dhune.
Haradinaj përmes një postimi në Facebook u ka bërë thirrje serbëve në veri të heqin dorë nga aktet e dhunës dhe mos të bien pre e interesave politike të Vuçiqit, të cilit sipas Haradinajt po i lëkundet pushteti.
“Tensionet në veri janë të papranueshme! Sulmet dhe lëndimi i policëve janë akt i rëndë dhune dhe si të tilla janë të dënueshme. Serbët lokalë të heqin dorë nga dhuna dhe të mos bijnë pre e interesave politike të Aleksandër Vuçiqit, të cilit edhe ashtu po i lëkundet pushteti”, ka shkruar Haradinaj.
Ai përmes një postimi në Facebook ka thënë se kryeministri Kurti duhet të jetë i kujdesshëm dhe mos të marrë veprime pa u koordinuar me faktorin ndërkombëtar.
“Kryeministri i Kosovës nga ana e tij, të jetë maksimalisht i kujdesshëm dhe të mos ndërmarrë veprime të pakoordinuara me partnerët ndërkombëtarë. Ngërçi politik me serbët lokalë të Kosovës në atë pjesë, mund të zgjidhet vetëm me dialog të hapur me ta. Kosova nuk e ka luksin të veprojë e vetme dhe e pakoordinuar me miqtë ndërkombëtarë në kapërcimin e gjendjes së krijuar në veri. Apeloj tek qytetarët serbë dhe tek institucionet e Kosovës që të bëjnë të pamundurën në qetësimin e situatës”, ka shkruar Haradinaj.
