Haradinaj përmes një postimi në Facebook, ka thënë se dialogu i deritanishëm nuk guxon të zbehet, transmeton Teve1.info
“Zbatimi i rendit dhe ligjit në tërë vendin, duhet të ndodh në përputhje me Kushtetutën dhe ligjet e Republikës së Kosovës. Dialogu i deritashëm nuk guxon të zbehet e të rikthehemi prapë të flasim për të njëjtat tema”, ka shkruar ai.
Sipas tij, Amerika kësaj here i ka dhënë shtytje procesit të udhëhequr nga BE-ja dhe e riktheu normalitetin në raportet Kosovë – Serbi.
Ai thotë se tani është momenti i duhur që BE-ja ta dorëzojë portofolin te Bideni për marrëveshjen finale për njohje reciproke.
“Amerika kësaj here i dha shtytje procesit të udhëhequr nga BE dhe ndihmoi dhe e riktheu normalitetin në raportet Kosovë-Serbi. Duke i shprehur mirënjohje Bashkimit Evropian për lehtësimin e dialogut, është momenti i duhur që BE ta dorëzojë portfolion te Presidenti Biden, për marrëveshjen finale për njohje reciproke Kosovë – Serbi”, tha më tej Haradinaj.
Kujtojmë se të enjten nuk është arritur asnjë marrëveshje mes Kosovës dhe Serbisë, pas takimit trepalësh në Bruksel.
Përfaqësuesi i lartë i BE-së, Josep Borrell dje ka thënë se në takimin me kryeministrin e Kosovës, Albin Kurti dhe presidentin e Serbisë, Aleksandar Vuçiq nuk ka pasur marrëveshje, por sipas tij nuk do të dorëzohen, teksa tha se palët janë pajtuar që të vazhdojnë diskutimet. /teve1.info/
