Kryetari i Aleancës për Ardhmërinë e Kosovës, Ramush Haradinaj e ka quajtur njeri të ligë kryeministrin Albin Kurti.
Haradinaj këtë deklaratë e ka bërë në hapjen e fushatës zgjedhore të koalicionit AAK- Nisma, Konservatoret, Forumi Intelektual E30 të dielën në Prishtinë.
Ai ka thënë se në kohëra të vështira janë krijuar njerëz të zot, ndërkaq sipas tij kur vjen koha e mirë dalin njerëz si Kurti që siç është shprehur e sjellin kohën e keqe prapë.
“Në kohëra të vështira janë krijuar njerëz të zot, e ata një pjesë janë në tokë, të gjallë, e një pjesë në qiell, e ja kanë sjell lirinë këtij vendi. Kur vjen koha e mirë, krijohen, dalin edhe njerëz të lig. Albin Kurti është njeri i lig. Klika e tij janë njerëz të ligj e kur vijnë njerëz të ligj sikur Albin Kurti vijmë në kohën e keqe prapë. Prandaj, sot nevojiten njerëzit e zot”, tha Haradinaj.
Më tej ai ka thënë se për të fituar Kosova dhe për të fituar siguri të plotë e anëtarësim në NATO duhet të hiqet mashtruesi.
“Për të fituar Kosova duhet me heq mashtruesin, e pse duam me heq….duhet me heq mashtruesin se duam siguri të plotë dhe të përjetshme, duam anëtarësim në NATO dhe duam anëtarësim në planin aksional, duam miqësi me Amerikën për ata duam me heq mashtruesin. Duam me rrit mbrojtjen, investimet në mbrojtje, me rrit investimet në mbrojtje dhe me siguruar përjetësisht Kosovën, nuk duam të bëjmë lojna me sigurinë nacionale, pas shpinës së aleatëve tonë e në interes të Rusisë dhe Serbisë nga argati i tyre, duam me heq mashtruesin se duam siguri energjetike dhe prej këtu iu drejtohem shko mashtrues se nuk duam me ble energji te dostat e tij, armiqtë tonë e me ia shit qytetarëve dy herë më të lartë…shko Albin, shko Nagip, Shko Dejon, shko Martin se nuk duam të na vidhni, shkoni që duam gazsjellësin amerikan”, tha ai.
