Kandidatja për deputete nga radhët e Partisë Demokratike të Kosovës, Ganimete Musliu, ka akuzuar Listën Serbe dhe Lëvizjen Vetëvendosje se veriun e Kosovës po e përdorin për të mbuluar dështimet.
Ajo ka thënë se kjo pjesë e Kosovës, bëhet temë sa herë që ka zgjedhje.
Hapjen e re të urës për këmbësor mbi Ibër, ajo e ka quajtur improvizim në kohë fushate.
Në emisionin “InfoNata” në Tëvë1, Musliu është shprehur se gjatë ditëve të fushatës siç ka thënë ajo mund të shihen veprime të ngjashme edhe më shumë.
“Si nga pala serbe si nga partia që është në pushtet, veriu po përdoret për të mbuluar të metat dhe problemet që kërkojnë zgjidhje reale dhe imediate. Veriu i Kosovës duhet të trajtohet barabartë si çdo pjesë tjetër e Kosovës dhe mos të trajtohet me procese të veçanta apo të caktuar sikur ka ndodhur tash. Sa herë që ka zgjedhje veriu bëhet temë. Jemi në fushatë zgjedhore dhe improvizimet e tilla janë të pritshme dhe ndoshta ende s’kemi parë çfarë do të shohim në ditët e ardhshme. Keqpërdorim i gjendjes emocionale të qytetarëve të Kosovës dhe asaj pjesë që është jashtëzakonisht e ndjeshme”, ka thënë ajo.
Duke komentuar vendimin e kryetarëve të Listës Serbe në katër komunat në veri të Kosovës për largim nga Asociacioni i Komunave të Kosovës,ndonëse ka thënë se nuk është shumë e informuar, një vendim i tillë sipas saj nuk është befasi duke pasur parasysh qasjen e Listës Serbe.
