Vëzhgimi do të rritet, e rrugët do të jenë më të kontrolluara.
Stacioni policor i Policisë së Kosovës, në Izvor të Zvecanit, dy kilometra afër territorit të Serbisë, u hap më 9 qershor.
E në një intervistë për tëvë1, drejtori i Përgjithshëm i Policisë së Kosovës, Gazmend Hoxha tha se është një hap tutje për kufij më të sigurt.
“Ajo pjesë ka qenë pjesë e pamenagjueshme në të kaluarën, edhe është pjesa rreth kufirit që është përdor edhe te sulmi i Banjskës, sulmi terrorist në Banjskë. Ka përdorur atë rrugë, edhe një rrugë shumë pranë saj, për tu afruar deri në Banjskë. Hapja e këtij stacioni policor, është stacioni policor i mbikëqyrjes së kufirit, në Izvor, është në vazhdën e investimeve që Policia e Kosovës dhe ministria e Punëve të Brendshme, kanë bërë dhe do të bëjnë në të ardhmën, me qëllim që kufijtë tanë të jenë sa më të sigurt”, tha Hoxha.
Sipas drejtorit Hoxha, me hapjen e stacionit të ri në Izvor, do ta parandalohet kontrabanda dhe hyrja ilegale e çdo grupi kriminal që tenton ta shfrytëzojë këtë zonë, për të hyrë në territorin e Kosovës.
“Në veçanti, në atë pjesë ku në të kaluarën kemi pasë telashe, ka pasë kontrabandë. Po kjo është e vërtetë, është një investim shumë I rëndësishëm, do ta ketë një rol shumë pozitiv, në parandalim të aktiviteteve kriminale, e në veçanti kontrabandës, me armë, e njerëz, kontrabanda me mallra dhe pamundësimin e grupeve kriminale për të përdor atë territor atje, efekti do të jetë shumë i fuqishëm”, deklaroi drejtori i PK-së.
I pyetur për situatën e sigurisë në territorin e Kosovës, drejtori Hoxha thotë se është e qetë, përveç në katër komunat veriore.
“Situata e Sigurisë në përgjithësi në vendin tonë, bazohet në vlerësimet tona të inteligjencës dhe shërbimeve të tjera, të sigurisë, vlerësohet të jetë e qetë, përveç në veriun e vendit ku vazhdon të jetë e qetë por që ka një lloj fragjiliteti varësisht nga veprimet politike dhe qëllimet e ndryshme që mund të vijnë nga akterë të cilët akoma marin direktiva nga Serbia, edhe qëllimi i Serbisë është që të paraqesë veriun e vendit si territor të pamenagjueshëm”, tha ai.
Sipas drejtorit, Policia e Kosovës do të vazhdojë të punojë për të gjithë qytetarët pa dallim, në ruajtjen e qetësisë publike.
