Komisioni Qendror i Zgjedhjeve (KQZ) ka njoftuar zyrtarisht nisjen e periudhës së aplikimit për regjistrimin e votuesve jashtë Kosovës, për zgjedhjet e parakohshme parlamentare që do të mbahen më 28 dhjetor.
Sipas njoftimit, periudha e aplikimit zgjat 11 ditë, nga 26 nëntori deri më 6 dhjetor 2025.
KQZ bën të ditur se shtetasit e Kosovës që jetojnë jashtë vendit mund të regjistrohen përmes dy mënyrave:
- Platformës elektronike: diaspora.kqz-ks.org
- Postës: duke dërguar aplikimin në kutinë postare të KQZ-së në Kosovë.
“Gjatë kësaj periudhe 11 ditore (26 nëntor – 6 dhjetor 2025), të gjithë shtetasit e Kosovës që jetojnë jashtë vendit mund të aplikojnë për t’u regjistruar si votues jashtë Kosovës”, thuhet në njoftimin e KQZ-së.
Gjatë aplikimit, qytetarët mund të zgjedhin vetë formën e votimit:
- të votojnë në një nga përfaqësitë diplomatike të Kosovës;
- të dërgojnë fletëvotimin me postë në kutinë postare të KQZ-së në Kosovë;
- ose të dërgojnë fletëvotimin përmes kutive postare të KQZ-së jashtë Kosovës.
KQZ thekson se në rast se në përfaqësitë diplomatike tejkalohet numri maksimal i votuesve, atëherë aplikuesit “do të udhëzohen për regjistrim për mënyrat e tjera të votimit përmes postës, sipas parimit të kohës së aplikimit”.
KQZ sqaron se regjistrimi për të votuar jashtë Kosovës vlen vetëm për shtetasit që duan ta ushtrojnë të drejtën e votës nga diaspora.
“Shtetasit e Kosovës që regjistrohen për të votuar jashtë Kosovës, do të largohen nga Lista Votuese brenda Kosovës, e cila shpërndahet në vendvotime në ditën e zgjedhjeve”, thuhet në njoftim.
Kjo nënkupton që votuesi i regjistruar nga jashtë nuk e gjen emrin në listat brenda Kosovës, por vetëm në listën e votuesve jashtë vendit.
Ndërkohë, ata që jetojnë jashtë por nuk regjistrohen, vazhdojnë të figurojnë në listën e votuesve brenda Kosovës dhe mund të votojnë vetëm fizikisht në vend.
Çdo qytetar me të drejtë vote mund të kontrollojë qendrën e tij të votimit në platformën: qv.kqz-ks.org.
KQZ u bën thirrje të gjithë shtetasve në diasporë që të marrin pjesë aktivisht në procesin zgjedhor:
“KQZ inkurajon të gjithë shtetasit e Kosovës që jetojnë jashtë vendit që të shfrytëzojnë të drejtën e tyre kushtetuese, fillimisht duke u regjistruar si votues jashtë Kosovës dhe më pas duke votuar.”
- Afatet e votimitVotimi në përfaqësi diplomatike: 27 dhjetor
- Votimi përmes postës: nga 12 dhjetori deri më 27 dhjetor
