Sot, është hapur zyrtarisht edicioni i njëzet e pestë i Panairit të Librit në Prishtinë. Panairi mblodhi shtëpitë botuese të vendit dhe rajonit në platonë e Pallatit të Rinisë dhe të Sporteve në kryeqytet.
Sipas organizatorëve, numri i titujve të rinj në gjuhën shqipe është rreth dy mijë, kurse numri i titujve të viteve të fundit rreth gjashtë mijë.
Kryetari i Shoqatës së Botuesve të Kosovës, Edon Zeneli theksoi se ka thënë se ky Panair i Librit ka shërbyer gjithnjë si dritarja kryesore e leximit në Kosovë.
“Gjuha kryesore që ne e kemi parasysh gjithmonë është shkrimi i përvjetorëve të cilët koincidojnë me panairin e librit sivjet kemi 4 përvjetorë, është 400 vjetori i lindjes së Pjetër Bogdanit, është 200 vjetori i lindjes së Pashko Vasës, 150 vjetori i lindjes së Faik Konicës, 100 vjetori i lindjes i Martin Canaj të cilët shquhen goxha në ligjërime nga njohës të fushës profesorë letërsie studiues i letërsisë apo edhe me bashkëbisedime me njohësish të cilët i njohin këto figura letrare dhe periudha letrare. Përkundër kësaj gjithashtu kemi edhe promovime veprash diskutime raport me tema që na interesojnë me letërsinë dhe këto të gjitha mbahen në kuadër të Panairit të Librit në sallën e dytë ku është edhe salla e promovimeve… Po ditën e shtunë siç është tashmë traditë do të ndahen çmimet për letërsi që jepen në kuadër të panairit kjo për të veçuar veprat të cilët duhet ta kenë vëmendjen dhe kujdesin e lexuesve”, theksoi ai.
Mijëra qytetarë pritet të bëhen pjesë e panairit i cili zgjat nga 11 deri më 15 qershor, për të eksploruar dhe blerë tituj librash të ndryshëm, nga historia, filozofia, letërsia, librat motivues, librat për fëmijë e të tjerë.
Panairi shihet nga lexuesit edhe si një ofertë e mirë financiare, për arsye se, shtëpitë botuese zbresin çmimet e librave për së paku 20 për qind e më së shumti deri në 80 për qind.
Në panairin i cili po mbahet në Prishtinë, mbizotërojnë librat e huaj të përkthyer në shqip nga anglishtja, gjermanishtja, turqishtja, arabishtja dhe gjuhët tjera.
Llogaritet që në panair po marrin pjesë rreth 100 botues nga Kosova, Shqipëria, Maqedonia e Veriut dhe diaspora.
