Diskutimet e së enjtes në Bruksel nuk rezultuan me ndonjë plan konkret për rrugën e zbatimit të marrëveshjeve për normalizim mes Kosovës dhe Serbisë.
Madje edhe vetë pjesëmarrësit kishin qëndrime kundërthënëse për epilogun e takimeve që u zhvilluan në margjinat e Samitit të Këshillit Evropian.
Sidoqoftë, përfaqësuesi i lartë i BE-së, Josep Borrell, ka fajësuar të dyja palët për mosgatishmëri, pasi siç tha ai, Kosova dhe Serbia kanë paraqitur parakushte që nuk kanë qenë të pranueshme për njëra-tjetrën.
Pavarësisht gjendjes aktuale, Ehat Miftaraj nga Instituti i Kosovës për Drejtësi, thotë se Kosova duhet të vazhdoj zbatimin e marrëveshjeve dhe të mos ndikohet nga qasja e Serbisë.
“Si marrëveshja bazë, si plani i veprimit kanë përcaktuar që raportet ose obligimet nuk janë më obligime Kosovë – Serbi, por janë obligime Kosovë – Bashkim Evropian dhe Serbi – Bashkim Evropian. Cili shtet i përmbush obligimet e saj më shpejtë atëherë do të thotë do të ketë edhe përfitime, qoftë në integrimin evropian, qoftë ndihma financiare … Pak ka rëndësi nëse Serbia nuk e nënshkruan marrëveshjen … Nëse Serbia nuk i përmbush këto obligime atëherë do të ketë edhe regres në integrimin evropian”, ka deklaruar ai.
Ndërsa ish-diplomati Blerim Canaj thotë se në këtë fazë koordinimi me ndërkombëtarët është shumë i domosdoshëm.
“Mendoj që ne i kemi parë viteve të fundit se moskoordinimi me partnerët tanë, marrja e vendimeve at-hok, marrja e vendimeve nën presionin e masës, do të thotë ta masim masën së pari dhe pastaj ta marrim një vendim, gjithmonë ka pasur kosto për vendin tonë … dua të them që është e domosdoshme, madje madje momentalisht është goxha edhe jetike që ne të jemi në koordinim me ta [ndërkombëtarët]”, ka deklaruar Canaj.
Kërkesa e vazhdueshme e ndërkombëtarëve është që palët të zbatojnë sa më shpejtë marrëveshjet dhe pa parakushte.
