Kryetari i Partisë Demokratike të Kosovës, Bedri Hamza në një konferencë për media ka deklaruar se vendimi i djeshëm i Gjykatës në Hagë është i padrejtë, i paqëndrueshëm dhe i pabazuar në fakte.
Hamza tha se vendimi dëmton, sipas tij, historinë e të tashmen dhe të ardhmen e Kosovës, ndërsa kritikoi edhe mënyrën se si ka evoluar procesi i Gjykatës Speciale në raport me bazën mbi të cilën është themeluar.
“Në këtë mbledhje u diskutua situata pas vendimit të djeshëm të Gjykatës në Hagë, është një konstatim i përgjithshëm se vendimi është i padrejtë, i paqëndrueshëm dhe i pabazuar në fakte. Është një vendim që dëmton historinë e tashme dhe të ardhmes së Kosovës, një vendim i një Gjykate e cila e ka devijuar komplet drejtimin e saj në raport me për çka është votuar në Kuvendin e Kosovës, bazë për krijimin e kësaj gjykate ka qenë raporti i Dicky Mart dhe akuzat e tmerrshme brenda raportit të Dick Martyt dhe çështja ka devijuar komplet në diçka tjetër dhe kryesisht e pabazuar në fakte dhe në prova konkrete, PDK do t’i mban të gjitha përpjekjet e nevojshme që të jem në komunikim për shkak të ndjeshmërisë së situatës, seriozitetit të situatës, situatës ku ndodhet vendi sepse kjo situatë i jep një mundësi në të ardhmen që shteti agresor që ka qenë në Kosovë Serbia ta përdorë për dëmtimin e Kosovës”, ka deklaruar Hamza.
Kreu i PDK-së ka bërë të ditur se do të zhvillojë takime me liderët e subjekteve të tjera politike, duke theksuar se çështja, sipas tij, nuk duhet të trajtohet si përkatësi e një partie të vetme.
“Do të takohem me të gjithë liderët e subjekteve politike, sepse kjo nuk është çështje që i takon një subjekti politik, ata të dënuar që ende janë të pafajshëm nuk janë shkuar atje si anëtar të subjektit politik, janë si ish ushtar dhe epror të UÇK-së. Besoj në bashkëpunimin me subjektet e tjera politike në krijimin e një konsensusi të nevojshëm dhe ne si PDK do të dalim me veprime konkrete duke e përfshirë ato ligjore dhe demokratike. PDK i ka nënshkrimet e gatshme, dmth 22 nënshkrime janë të gatshme, varësisht nga nevoja ne do të procedojmë prej situatës së krijuar”, ka deklaruar Hamza.
Hamza nuk ka specifikuar se cilat do të jenë veprimet konkrete të PDK-së, por ka theksuar se ato do të përfshijnë edhe iniciativa ligjore dhe demokratike./teve1.info/
