Kryetari aktual i Mitrovicës, Bedri Hamza, ka ushtruar të drejtën e votës sot së bashku me familjen e tij.
Përmes një postimi në Facebook, ai ka përgëzuar qytetarët dhe institucionet për zhvillimin e një procesi zgjedhor të qetë, demokratik dhe me rëndësi të veçantë për të ardhmen e Mitrovicës.
“Unë dhe familja ime e përmbushëm obligimin tonë qytetar duke votuar për Mitrovicën. I falënderoj dhe përgëzoj institucionet dhe qytetarët për një proces zgjedhor të qetë dhe demokratik, që është jashtëzakonisht i rëndësishëm për të ardhmen e qytetit tonë”, shkroi Hamza.
Ai gjithashtu ka bërë thirrje për pjesëmarrje sa më të gjerë:
“Ftoj të gjithë mitrovicasit të dalin dhe të shfrytëzojnë të drejtën e tyre për të votuar. Nuk ka nder më të madh sesa të japësh kontribut për të mirën e përbashkët. Votoni dhe vendosni vetë për Mitrovicën tonë!”
