Kryetari i Partisë Demokratike të Kosovës, Bedri Hamza, ka pritur në takim kryediplomaten e Shqipërisë, Elisa Spiropali, me të cilën ka diskutuar për bashkëpunimin ndërmjet dy vendeve dhe sfidat aktuale në arenën ndërkombëtare.
Përmes një postimi në Facebook, Hamza ka vlerësuar përkushtimin e Spiropalit në mbështetje të Kosovës, duke theksuar se Shqipëria ka qenë dhe mbetet zëri i Kosovës aty ku ajo nuk është e pranishme.
Ai ka nënvizuar gatishmërinë për ndërtimin e një agjende të përbashkët strategjike mes Kosovës dhe Shqipërisë, përballë sfidave kombëtare dhe ndërkombëtare.
Hamza po ashtu ka falënderuar qeverinë shqiptare për ngritjen e zërit kundër, siç është shprehur ai, padrejtësive dhe përpjekjeve për rishkrim të historisë nga Gjykata Speciale në Hagë.
“Një takim i përzemërt me kryediplomaten e Shqipërisë, që me përkushtim po i jep mbështetje Kosovës kudo në arenën ndërkombëtare. Shqipëria ka qenë dhe mbetet zëri ynë aty ku ne nuk jemi. E mirëpres gatishmërinë për ndërtimin e një agjende të përbashkët strategjike mes dy vendeve tona, përballë sfidave kombëtare dhe ndërkombëtare. Faleminderit qeverisë shqiptare që pareshtur e ka ngritur zërin kundër padrejtësive dhe përpjekjeve për rishkrim të historisë nga Gjykata Speciale në Hagë”, ka shkruar ai.
