Kryetari i Partia Demokratike e Kosovës, Bedri Hamza, e ka cilësuar si jokushtetuese seancën e sotme për zgjedhjen e presidentit, duke e quajtur atë një “puç kushtetues”.
Sipas tij, situata politike në vend është bërë e ndërlikuar, ndërsa zhvillimet e fundit, siç tha ai, përfaqësojnë kulmin e papërgjegjshmërisë.
“Po vërehet që kjo kohë vendin po e kalon në një situatë bukur komplekse, por sonte mosserioziteti dhe papërgjegjshmëria e kanë mbërritur kulmin. Ky është një puç kushtetues”, deklaroi Hamza.
Ai theksoi se shteti dhe rendi kushtetues janë ndërtuar me sakrificë dhe duhet të respektohen pa përjashtim.
“Është dashur shumë gjak, shumë mund, shumë sakrificë e shumë vuajtje që ne ta kemi lirinë, ta kemi shtetin dhe ta kemi Kushtetutën. Vendimet e Gjykatës Kushtetuese duhet të respektohen gjithmonë, edhe kur mund të kemi komente”, u shpreh ai.
Hamza kritikoi ashpër mënyrën se si është zhvilluar procesi i votimit për presidentin, duke e cilësuar atë si kundërkushtetues.
“Kjo që ka ndodhur sonte është shkelje kushtetuese. Është hyrë në procedurë të votimit për zgjedhjen e presidentit apo presidentes në mënyrë kundërkushtetuese dhe kjo praktikë duhet të ndërpritet”, tha ai.
Sipas tij, vazhdimi i kësaj qasjeje rrezikon stabilitetin politik dhe funksionimin e institucioneve.
“Duhet të ndërpritet me qëllim që të ruhet stabiliteti politik dhe institucionet e vendit. Në të kundërtën, ekziston rrezik dhe ai rrezik ka adresë – Lëvizja Vetëvendosje dhe Albin Kurti”, deklaroi Hamza.
Ai shtoi se nuk dëshiron të besojë se veprimet aktuale synojnë destabilizimin e vendit.
“Nuk dua të besoj që qëllimi është ta çojmë vendin në anarki. Nuk mund të zgjidhet presidenti në mënyrë antikushtetuese. Nga 25 dhjetori deri më sot nuk ka pasur as sinqeritet, as seriozitet dhe as vullnet për t’i kompletuar institucionet”, përfundoi Hamza.
