Kryetari i Partisë Demokratike të Kosovës, Bedri Hamza, ka bërë të qartë se PDK-ja nuk do të propozojë emra për postin e presidentit, pas ofertës së fundit nga Lëvizja Vetëvendosje që partitë opozitare të dalin me tre kandidatë të përbashkët.
Hamza e ka cilësuar këtë propozim si një manovër politike të kryeministrit Albin Kurti, duke theksuar se për PDK-në çështja e presidentit tashmë konsiderohet e përfunduar.
Ai ka vlerësuar se ideja e re e VV-së nuk është serioze dhe se një diskutim i tillë do të duhej të zhvillohej më herët, kur kishte hapësirë për marrëveshje mes partive.
“Ne jemi parti të ndryshme. PDK-ja e LDK-ja janë subjekte në vete. AAK-ja është në vete. S’e ka ftuar fare. Me LDK-në ka tjera oferta, me PDK-në kemi diskutuar për presidentin. S’është çështje e rehatimit të individit, por çështje serioze që ka mundur të diskutohet në tavolinë kur ishim bashkë, por s’ka pasur seriozitet nga VV-ja e s’ka as tash”, ka thënë ai në holl të Kuvendit para seancës së jashtëzakonshme.
