Kreu i Partisë Demokratike të Kosovës, Bedri Hamza, ka pritur në takim udhëheqësit e Organizatës së Veteranëve të Luftës së UÇK-së.
Hamza ka bërë të ditur se gjatë takimit është diskutuar për sfidat me të cilat po përballet vendi, si dhe për rëndësinë e ruajtjes së dinjitetit dhe të së vërtetës për luftën e Ushtrisë Çlirimtare të Kosovës.
“Ne folëm për rëndësinë e ruajtjes së dinjitetit, të së vërtetës për luftën tonë dhe të vlerave për të cilat u sakrifikuan breza të tërë. Veteranët e UÇK-së bartin mbi supe pjesën më të rëndësishme të historisë së vendit tonë. Ata qëndruan në ditët më të vështira dhe sakrifikuan për lirinë”, ka shkruar Hamza.
Kreu i PDK-së ka bërë gjithashtu thirrje për pjesëmarrje në protestën e paralajmëruar për 1 tetor në Prishtinë, në mbështetje të ish-krerëve të UÇK-së të dënuar nga Gjykata Speciale.
“Më 1 tetor, në orën 16:00, në sheshin ‘Skënderbeu’ në Prishtinë, do të jemi bashkë me veteranët, studentët dhe të gjithë qytetarët e vendit tonë. Të gjithë bashkë kundër padrejtësisë!”, ka deklaruar Hamza.
