Kandidati i PDK-së për kryeministër, Bedri Hamza, këtë të diel ka mbajtur tubim me mjekë, infermierë, farmacistë dhe personel shëndetësor.
Hamza ka premtuar 1.5 miliardë euro investime në shëndetësi brenda një mandati qeverisës.
“As që e kam dilemë a e meritoni, as që e kam dilemë a bëhet kjo, as nuk është që nuk e di që kjo nuk është e lehtë. E di koston e saj, e di vështirësinë për me u bë, por e di gatishmërinë, vendosmërinë edhe nevojën për me u bë. Edhe ka me u bë. Në muajt e parë të mandatit, 50% rritja e pagave. Ju nuk duhet të jeni adresë e shqetësimeve për ato që nuk i kryen qeveria. Ju nuk duhet të jeni adresë as e nervozave të pacientëve për shkak se qeveria nuk ju ka krijuar kushte. Prandaj, ne do ta dyfishojmë buxhetin për furnizim me barna dhe sigurisht që spitalet tona, shëndetësia primare, qendrat kryesore universitare, do të jenë të furnizuara me barna”, ka thënë Hamza, thuhet në komunikatën e PDK-së.
Ai ka theksuar se aspekti i mbështetjes politike, institucionale dhe financiare nuk ka me qenë pengesë që në shëndetësi ta kemi në një tjetër nivel.
“Sepse një sistem shëndetësor cilësor është jo vetëm një e drejtë, por është themeli për një të ardhme më të mirë për Kosovën. Le të bëhemi bashkë për një shëndetësi më të fortë, për një të ardhme më të ndritur, për një Kosovë që besoj nuk ka këtu dikush që nuk pajtohet se mund të jetë ma mirë”, ka thënë Hamza.
Ndër të tjera, Hamza ka premtuar dyfishim të buxhetit për blerjen e barnave esenciale, 50% rritje të pagave për mjekët, infermierët dhe personelin shëndetësor, barna falas për të moshuarit me sëmundje kronike, funksionalizim të sigurimeve shëndetësore dhe digjitalizim të sistemit shëndetësor, riorganizim të specializimeve në shëndetësi dhe Ligj për Specializantët, fuqizim të spitaleve rajonale dhe ndërtim të Sistemit Kombëtar të Emergjencave Mjekësore.
