Kryetari i Partisë Demokratike të Kosovës, Bedri Hamza ka vizituar familjet e Hashim Thaçit, Kadri Veselit dhe Jakup Krasniqit, pas vendimit të fundit të gjykatës në Hagë.
Përmes një deklarate, Hamza tha se gjatë vizitës u ka shprehur familjeve mbështetjen e tij, duke theksuar se ato nuk janë dhe nuk do të jenë vetëm.
“Dhimbja e tyre është dhimbja jonë. Mërzia e tyre është mërzia e popullit tonë”, ka shkruar Hamza.
Ai ka deklaruar gjithashtu se mbetet krenar për figurat e përmendura, luftën për liri dhe atë që, sipas tij, ato përfaqësojnë në historinë dhe shtetin e Kosovës.
“Bashkë do të qëndrojmë, bashkë do të angazhohemi dhe bashkë do ta vazhdojmë betejën për drejtësi e liri, deri në kthimin në atdhe të luftëtarit të fundit të lirisë”, është shprehur Hamza.
Në fund të deklaratës, kreu i PDK-së ka shkruar: “Dje, sot dhe përjetësisht, çlirimtarë!”./teve1.info/
