Kryetari dhe kandidati për Kryeministër nga Partia Demokratike e Kosovës, Bedri Hamza duke komentuar përfshirjen e fëmijëve në fushatën zgjedhore të Kryeministrit në detyrë, Albin Kurti, i shpreh se një veprim i tillë është i papranueshëm.
“Unë nuk e pranoj një gjë të tillë. Për moshën është e papranueshme. E dyta, ne duhet të jemi shumë të kujdesshëm për fëmijët. Edhe unë kërkoj mirëkuptim, edhe besoj që ka me gjetur këtë mirëkuptim kjo lutja ime. Mediat, edhe të gjithë të tjerët, që të kenë kujdes vajzën, e cila e ka bërë një recitim, çfarë e ka bërë, çfarë e ka bërë, se ajo është një vajzë që ne duhet me pasur kujdes. Është në një moshë që ne duhet me pasë kujdes. Personalisht, në prezencën time s’kishte mund me ndodhë. Garantoj dhe ju siguroj që s’kishte mund me ndodhë. Se për mua, fëmijët janë më të vlefshëm se çdo gjë. Fushata ka me kaluar. Edhe mandati i një qeverie ka me kaluar. Mirëpo ne duhet ta lëmë një shije të mirë. Fushata duhet të jetë një veprim, i cili ka të bëjë me votat”, tha ai.
Ai në lidhje me këtë tha se edhe në procesin e privatizimit, nuk ka pasur ndryshime përveç ndryshimit në disa udhëheqësi, borde dhe disa drejtorë.
Sa i përket mundësisë së paraqitjes së një ankese në Panelin Zgjedhor për Ankesa dhe Parashtresa (PZAP), Hamza tha se institucionet kompetente duhet të veprojnë edhe pa pritur ankesa formale, pasi rasti tashmë është bërë çështje publike.
“Besoj që, besoj që organet kompetente, në këtë rast edhe PZAP-ja, duhet me kryer punën e vet, edhe pa ankesë. Shikoni, janë disa gjëra që kanë nevojë për ankesë, kanë nevojë për procedurë, por këto tashmë janë parë, janë shndërruar në çështje publike. Ka pasur ankesa edhe të organizatave që i mbrojnë të drejtat e fëmijëve, edhe duhet të jemi të kujdesshëm”, u shpreh ai.
Ndërkaq këto, Hamza i tha në një konferencë ku prezantoi zotimet e PDK-së për shëndetësinë duke premtuar sigurime shëndetësore, furnizim të rregullt me barna esenciale dhe modernizim të spitaleve.
Ndërsa, në tubimin e së dielës të Lëvizjes Vetëvendosje të mbajtur në Vushtri, lideri i kësaj partie, Albin Kurti e ka ftuar në foltore një vajzë e cila edhe recitoi një poezi dhe kjo më pas ngjalli reagime të ashpra.
