Kryetari i Partisë Demokratike të Kosovës ka thënë se i ka kthyer përgjigje pozitive kryetarit të Lëvizjes Vetëvendosje njëherit kryeministër në detyrë ftesës për takim.
Por, ai ka thënë se ky takim duhet të mbahet në objektin e Kuvendit të Kosovës dhe jo në objektin e Qeverisë, ashtu siç thuhet në ftesën e Kurtit.
“Ftesa duhet të dërgohet në emër të kryetarit të partisë më të madhe dhe se takimi do duhej të mbahej në objektin e Kuvend. Unë do të sillem në mënyrë të përgjegjshme. Unë ja ktheva përgjigjen që PDK është e gatshme të takohet nesër në ora 09:00 në objektin e Kuvendit të Kosovës”, u shpreh Hamza për media pas mbledhjes së Kryesisë së PDK-së.
Ai ka thënë se para se të flitet për poste e marrëveshje për formimin e institucioneve duhet të diskutohet për prioritetet, orientimet.
“Para se të flasim për pozitat e kam thënë dhe e ripërsëris është tepër e rëndësishme prioritetet, vizioni për të ardhmen, programi, adresimi i sfidave të cilat i ka Kosova. Nëse nuk ka dakordim për këto, nuk është qëllimi i PDK-së të ketë një numër të caktuar të ministrive, të ketë një kryetar kuvendi, presidentin apo sidoqoftë”, u shpreh Hamza./teve1.info/
