Në 27-vjetorin e rënies së 41 dëshmorëve të Ushtrisë Çlirimtare të Kosovës, të udhëhequr nga komandanti Mujë Krasniqi, kandidati për kryeministër nga radhët e PDK-së, Bedri Hamza, ka bërë homazhe te varrezat në Marinë të Skenderajt.
Hamza ka nderuar sakrificën e heronjve të kombit, duke theksuar rëndësinë e kujtimit dhe vlerësimit të kontributit të tyre për lirinë dhe shtetin e Kosovës.
“Në 27-vjetorin e rënies së 41 dëshmorëve të Ushtrisë Çlirimtare të Kosovës, në krye me komandantin Mujë Krasniqi, bëra homazhe te varrezat në Marinë të Skenderajt. Në mëngjesin e 14 dhjetorit, ata ranë në rrugën e lirisë, duke e përjetësuar emrin e tyre në historinë e lavdishme të Kosovës. Sakrifica e tyre është trashëguar brez pas brezi dhe në këtë ditë, që përkon edhe me përvjetorin e themelimit të Ushtrisë së Kosovës, nderimi për ta merr një kuptim edhe më të thellë. Liria dhe shteti që gëzojmë sot janë ndërtuar mbi sakrificën e heronjve, dëshmorëve dhe martirëve tanë. Lavdi e përjetshme komandantit Mujë Krasniqi dhe të gjithë të rënëve për lirinë tonë”, ka shkruar ai në Facebook.
