Kryetari i Partisë Demokratike të Kosovës (PDK), Bedri Hamza, ka reaguar për vdekjen e Flora Brovinës.
Ai, në një shkrim në rrjetin e tij social, Facebook, ka thënë se Brovina nuk u përkul kurrë para vështirësive dhe mbetet simbol i qëndresës dhe dashurisë për atdheun.
“Sot na la Flora Brovina. Na la një grua e fortë, një nënë, mjeke, intelektuale dhe veprimtare që gjithë jetën ia kushtoi Kosovës dhe qytetarëve të saj. Flora nuk u përkul kurrë para vështirësive. Ajo qëndroi me dinjitet, guxim dhe përkushtim deri në fund të jetës. Për mua, për PDK-në dhe për të gjithë ata që patën fatin ta njohin, ajo do të mbetet përjetësisht simbol i qëndresës dhe dashurisë për atdheun”, tha Hamza në shkrimin e tij.
