Hamasi ka publikuar një video duke dhënë dëshmi se dy pengje tjera që po mbahen në Gaza janë gjallë, raporton BBC.
Në video, që nuk ka datë, shihet izraeliti Omri Miran, duke thënë se është mbajtur për 202 ditë dhe pengu amerikan Keith Siegel, tregon se kaloi këtë javë festën hebraike “Pesach”, që dëshmon se videot janë bërë së fundi.
Të dy u kapën në sulmin vrasës të Hamasit në territorin izraelit më 7 tetor. Në sulm u vranë rreth 1200 persona e u morën afro 250 pengje. Në kundërpërgjigje forcat izraelite nisën sulmin në Gaza. Në ofensivën mbi 200 ditore janë vrarë mbi 34 mijë palestinezë, bazuar në shifrat e Ministrisë së Shëndetësisë së Gazës.
Duke reaguar ndaj videove, familjet e dy pengjeve kanë thënë se do të vazhdojnë të luftojnë për kthimin e tyre.
Po ashtu i kanë bërë thirrje Qeverisë së Izraelit të sigurojë një marrëveshje të re për lirimin e pengjeve.
Videoja e re është publikuar në ditën kur Hamasi tha se po shqyrton një propozim të fundit të Izraelit për armëpushim.
Në mediume është raportuar se Egjipti ka dërguar një delegacion në Izrael për të negociuar. Egjipti është duke ndërmjetësuar në bisedimet mes Izraelit e Hamasit.
Një marrëveshje e tillë do të përfshinte lirimin e pengjeve të mbajtura nga Hamasi dhe do të mund të ndalte një sulm tokësor izraelit të planifikuar në qytetin jugor në Gaza, Rafah, ka thënë ministri i Jashtëm i Izraelit, Israel Katz.
