Hamasi ka rënë dakord me një propozim të ri për armëpushim të paraqitur nga i dërguari i posaçëm i Shteteve të Bashkuara, Steve Witkoff, tha të hënën një zyrtar palestinez pranë grupit për agjencinë Reuters.
Marrëveshja e propozuar përfshin një armëpushim 70-ditor dhe mund të shënojë një hap të rëndësishëm drejt përfundimit të luftës në Gaza.
Sipas burimit, marrëveshja do të përfshinte lirimin e dhjetë pengjeve izraelite në dy faza, në këmbim të armëpushimit dhe një tërheqjeje të pjesshme të forcave izraelite nga Rripi i Gazës.
Po ashtu, propozimi parashikon lirimin e qindra të burgosurve palestinezë, përfshirë persona që po vuajnë dënime të gjata me burg në burgjet izraelite.
Deri më tani nuk ka pasur reagim zyrtar nga qeveria izraelite.
Kujtojmë se më 18 mars, Izraeli zyrtarisht ndërpreu një marrëveshje të mëparshme armëpushimi të arritur në janar dhe rifilloi ofensivën e tij ushtarake.
Hamasi ka shprehur gatishmërinë për të liruar të gjithë pengjet e mbetura që u rrëmbyen gjatë sulmit të 7 tetorit 2023 në jug të por grupi ka kërkuar si kusht për një armëpushim të përhershëm tërheqjen totale të forcave izraelite nga Gaza.
Kryeministri izraelit Benjamin Netanyahu, nga ana tjetër, ka deklaruar se është i hapur vetëm për një armëpushim të përkohshëm në këmbim të lirimit të pengjeve, duke ritheksuar se lufta nuk do të përfundojë pa shkatërrimin e plotë të Hamasit.
Rripi i Gazës është shkatërruar gjerësisht, ndërsa organizatat humanitare paralajmërojnë për rritje dramatike të rasteve të kequshqyerjes dhe mungesës së ndihmës bazë për civilët e mbetur.
