Pas muajsh negociatash intensive, Hamasi ka pranuar për herë të parë kornizën e planit “Board of Peace”, e cila parasheh çarmatimin e plotë të grupit në Rripin e Gazës.
Plani parashikon inventarizimin dhe ruajtjen e armëve të rënda të mbetura nën mbikëqyrjen e autoriteteve palestineze, duke hequr potencialisht pengesën më të madhe për avancimin e nismës së paqes për Gazën, të mbështetur nga presidenti amerikan Donald Trump.
Ky zhvillim vjen menjëherë pasi Hamasi përfundoi zgjedhjet e brendshme të udhëheqjes, në të cilat në krye të lëvizjes u zgjodh lideri me bazë në Gaza, Khalil al-Hayya, shkruan BBC, transmeton KosovaPress.
Zyrtarët palestinezë të përfshirë në negociata vlerësojnë se udhëheqja e re ishte e gatshme të merrte atë që ata e cilësojnë si vendimin politik më të rëndësishëm në historinë e Hamasit, i nxitur nga gjendja shkatërruese humanitare me të cilën përballen më shumë se dy milionë palestinezë në Gaza.
Megjithatë, mbetet ende herët për të vlerësuar nëse marrëveshja do të zbatohet plotësisht dhe nëse të gjitha palët do t’u përmbahen zotimeve të marra.
Nëse marrëveshja zbatohet, ajo mund të përbëjë hapin e parë të besueshëm drejt përfundimit të luftës që ka zgjatur gati tre vjet dhe të hapë rrugën për një proces më të gjerë politik.
Deri më tani, Izraeli nuk ka komentuar mbi këtë zhvillim.
