Lideri politik i Hamasit jashtë Gazës, Khaled Meshaal, ka ofruar siguri se grupi do të marrë masa që të ndalojë çdo sulm të mundshëm të ardhshëm ndaj Izraelit nga enklava palestineze e rrethuar, porse ka thënë se dorëzimi i armëve do të ishte sikur t’i “heqësh shpirtin” grupit.
Në një intervistë për Al Jazeera Arabic, shefi politik i Hamasit shprehu pozicionin e grupit në shumë çështje që mund të bëhen pengesë për të dërguar bisedimet e armëpushimit në fazën e dytë.
Hamasi tha të martën se armëpushimi nuk mund të ecë përpara nëse Izraeli vazhdon shkeljet e marrëveshjes , me autoritetet që thonë se armëpushimi është shkelur të paktën 738 herë që nga hyrja në fuqi më 10 tetor.
Meshaal poashtu hodhi poshtë mundësinë e pranimit të një autoriteti qeverisës jo-palestinezë për Gazën, mes spekulimeve rreth themelimit të një “bordi të paqes”.
Financial Times raportoi të martën se kandidatura e ish-kryeministrit të Mbretërisë së Bashkuar, Tony Blair , për në bord ishte përjashtuar, pas kundërshtimit nga disa shtete arabe dhe myslimane.
Të martën, një zyrtar i Hamasit tha se Izraeli nuk i është përmbajtur plotësisht fazës së parë të marrëveshjes, duke përmendur kalimin e pahapur të Rafah-ut, vëllimet e ndihmës shumë nën nivelet e dakorduara dhe sulmet pothuajse të përditshme izraelite.
Kryeministri izraelit Benjamin Netanyahu, megjithatë, tha se faza e parë ishte pothuajse e përfunduar dhe shprehu qëllimin e tij për të “arritur të njëjtat rezultate në fazën e dytë”, duke shtuar se do të takohej me Trump në Uashington, DC, në fund të këtij muaji për ta çuar përpara atë.
