Kryetari i Komunës së Vitisë, Sokol Haliti, për Tëvë1 tha se dëmtimi i rrugës ka ndodhur për shkak të ujërave nëntokësore, e që tashmë e kanë riparuar.
“Nuk është hapur tender tjetër, mirëpo ka pasur garancion, është proceduar në mënyrë ligjore dhe është detyruar kompania që ta meremetojë. Kjo ka ndodhur për shkak se ka pasur ujëra nëntokësor, ka qenë një rrugë e cila nuk ka qenë e asfaltuar asnjëherë. Atje kemi investuar me një fond të vogël. Gjendja e asaj rrugë ka qenë e keqe mirëpo tani është riparuar”, tha ai në emisionin “Infonata”
Ndërsa, i pyetur pse semaforët në Pozheran-Viti nuk janë funksional edhe pse janë vendosur në prill të vitit 2021, Haliti tha se ata janë funksional por vetëm duhet lëshuar.
“Këta semaforë janë funksional mirëpo nuk i kemi lëshuar. Ne kemi një plan të cilin e kemi hartuar, pas debatit me publikun e kemi miratuar në kuvendin komunal. Në plan të mobilitetit i kemi pasur edhe semaforët, kjo për shkak se nuk kemi mundur të krijojmë ishull, sinjalistikë tjetër për shkak të pronës private. Semaforët janë në rregull, ata vetëm duhet të lëshohen”, deklaroi ai.
Më tej ai shtoi se semaforët do jenë funksional kur organet kompetente vendosin. E kjo çështje sipas tij nuk është politike po vetëm teknike.
