Kryetari i Vitisë, Sokol Haliti, nga radhët e Lidhjes Demokratike të Kosovës, i është kundërpërgjigjur këshilltarit komunal nga Lëvizja Vetëvendosje, Durim Sylejmanit, i cili tha se në QKMF në Viti nuk ka asnjë lloj shërbimi duke filluar prej qepjes së plagëve.
Lidhur me këtë deklaratë, Haliti, ka thënë se të gjitha shërbimet bëhen në QKMF, si dhe në Emergjencën në fshatin Pozhoran.
“Krejt qytetarët e Vitisë e dinë se është Emergjenca në Pozhoran 24 orë, krahas asaj në Viti. QKMF në Viti funksionon, nuk është se nuk kryen shërbime. Të gjitha shërbimet bëhen në QKMF-në në Viti, përveç atyre sekondare, për shkak se dihen kompetencat e shëndetësisë primare. Ka shërbime të jashtëzakonshme në Viti, edhe Emergjenca funksionon, për shkak se konfiguracioni gjeografik na ka imponuar dhe unë kam investuar edhe në Pozhoran dhe për fshatrat që janë përreth tij. Kemi pas nevojë për të vërtetë”, tha ai në emisionin “Info Nata” në Tëvë1.
Haliti, deklaratën e Sylejmanit e ka quajtur gafë, si dhe sipas tij, nuk bëhet opozitarizem duke mohuar punën e punëtorëve shëndetësorë.
“Me thënë se nuk ka shërbime vërtetë në QKMF, unë mendoj se është gafë i këshilltarit se nuk është opozitarizem për me mohu punën e mirë që e bëjnë mantilbardhët aty, për shkak se aty ka edhe të Vetëvendosjes, pra ka anëtarë që kryejnë shërbime. Është një staf i shkëlqyeshëm”, tha kryetari i Vitisë.
Tutje, Haliti, tha se në kohen e pandemisë, me kujdesin e mantilbardhëve ndaj qytetarëve, Vitia krahasohet edhe me nivelet evropiane.
“As këshilltari nuk duhet ta harrojë kurrë, në kohën e pandemisë Vitia kur ishte e përfshirë e para, me kujdesin e mantilbardhëve ndaj qytetarëve ka qenë nivel vendi, ndoshta edhe në nivel evropianë”, shtoi Haliti. /teve1.info/
