Kryetari i Komunës së Vitisë, Sokol Haliti, ka reaguar ndaj deklaratave të kandidatit të AAK-së për këtë komunë, Labinot Gjini, duke thënë se pohimet e tij nuk janë të sakta.
Në një intervistë në emisionin “Ditari” në Teve1, Haliti theksoi se në arsim aktualisht ekzistojnë vende vakante dhe se nuk bëhet fjalë për tepricë të punëtorëve.
“Tash ky ka dal kandidat edhe diçka duhet me thënë edhe natyrisht unë e kuptoj, mundohem me mirëkuptu. Edhe unë e ruaj atë funksionin bazë që është argumentues dhe ju them se ne kemi përkundrazi vende vakante. Tash është një konkurs i cili ka dalur dhe do të përfundojë së shpejti për pasimin e vendeve vakante në shumë aspekte, edhe në teknologji informative, edhe në gjuhë të huaja edhe lami të tjera ku ka deficite. Është e vërtetë, te shkolla e mesme profesionale kur kam ardhur e kam gjetur një numër më të madh të punëtorëve të arsimit, por unë pavarësisht nuk kam dashur të sillem si diferencues dhe gradualisht i kam sistemuar, gjithmonë i kam ruajtur”, ka thënë Haliti.
Ai ka shtuar se kandidati i AAK-së nuk është i informuar drejt mbi gjendjen në arsim në këtë komunë.
“Shihet që ky nuk ka informacione të sakta, sepse ato i kanë institucionet arsimore në Viti. Ai mund të flasë ose të argumentojë nëse ka ndonjë rast, por unë them që kemi vende vakante, kemi gjëra të tjera që s’i kemi plotësuar shkollës dhe ne tashmë po e bëjmë më të mirë për qytetarët edhe me ligj”, ka deklaruar Haliti.
Kryetari i Vitisë ka përfunduar duke theksuar se gjatë mandatit të tij nuk ka pasur shkelje ligjore në qeverisjen lokale.
“Unë në qeverisjen time lokale nuk kam pasur asnjë shkelje të ligjit”, ka theksuar Haliti.
