Kosova, që tre ditë ka qenë objekt i sulmeve kibernetike të koordinuara.
Këto sulme dyshohet se vijnë nga grupe hakerësh me lidhje me Rusinë dhe me mbështetje të mundshme nga shteti rus.
Studiuesi i sigurisë kibernetike, Halil Berisha, bën të ditur se sulmet kanë prekur një numër të madh institucioni shtetëror dhe organizatash, duke përfshirë faqen zyrtare të Kryeministrit, ministritë, Aeroportin e Prishtinës dhe platforma të tjera të rëndësishme publike.
Berisha, ka njoftuar se këto sulme lidhen drejtpërdrejt me qëndrimin politik të Kosovës ndaj luftës në Ukrainë.
Sipas tij, arsyeja e sulmeve është mbështetja ushtarake që Kosova i ofron Ukrainës.
“Arsye për këtë është përkrahja ushtarake që ia bën Kosova Ukrainës”, theksoi Berisha.
Ai e ka cilësuar natyrën e sulmeve si të qartë dhe të identifikueshme.
“Sipas të gjitha shenjave, sulmi është DDoS dhe të dhënat janë të sigurta”, shtoi ai, duke shpjeguar se ky lloj sulmi mbingarkon faqet e internetit duke krijuar një numër shumë të madh vizitash në të njëjtën kohë, duke i bërë ato të pamundura për t’u mbajtur.
“Institucionet e Kosovës kanë reaguar në mënyrë shumë të shpejtë dhe kanë mbrojtur infrastrukturën ndaj këtyre sulmeve ruse! Kjo dëshmon që Kosova ka kapacitete njerëzore që duhet të merren seriozisht në këtë punë. Reagimi ndaj sulmeve (ani se ka ende faqe që janë offline) ka qenë i shpejtë për t’u mbrojtur, mirëpo në aspektin e parandalimit të këtyre sulmeve nevojitet punë edhe më e madhe. Këto sulme duhet të japin informatat e nevojshme për këtë punë. Gjithashtu, këto grupe ruse janë duke u përgatitur për një valë të re sulmesh, ku mund të përfshihen edhe kompanitë, kështu që për mbrojtje duhet të fillohen përgatitjet nga secili institucion, agjenci, kompani e organizatë!”, ka shkruar ai në një postim në Facebook.
Hakerët rusë e serbë sulmojnë faqen e Qendrës Kosovare për Studime të Sigurisë
