Ministrja e Industrisë, Ndërmarrësisë dhe Tregtisë, Rozeta Hajdari, thotë se gjatë hetimit dokumentet që janë marrë si prova në këtë dikaster janë klasifikuar si sekrete shtetërore, ndërsa njësia e policisë hetuese nuk ka prezantuar certifikatë të sigurisë sekrete.
Kështu sipas saj, kërkesa e policisë për pranim-dorëzim i këtyre provave dokumenteve ka qenë në kundërshtim me Ligjin për Mbrojtjen e Informacionit të Klasifikuar.
“Unë pres që organet e hetimit të kenë në vëmendje që krahas punës hetimore të mos cenojnë në asnjë rrethanë sigurinë shtetërore për sa kohë që bëhet fjalë për rezervën shtetërore të Republikës sonë e klasifikuar sipas Ligjit për Rezervën Shtetërore dhe Ligjit për Mbrojtjen e Informacionit të Klasifikuar. Sepse, gjatë hetimit dokumentet që janë marrë si prova nga ana e Policisë në MINT janë klasifikuar si sekrete shtetërore, ndërsa njësia e Policisë hetuese nuk ka prezantuar certifikatë të sigurisë sekrete, pra kërkesa e Policisë për pranim-dorëzim i këtyre provave dokumenteve ka qenë në kundërshtim me ligjin për mbrojtjen e informacionit të klasifikuar”, u shpreh Hajdari në konferencë për media.
Gjatë ditës së sotme, organet e rendit në Kosovë me urdhrin e Prokurorisë Speciale kanë arrestuar drejtorin e departamentit të rezervave shtetërore, Hafiz Garën, drejtorin e departamentin për integrime evropiane, Irgan Lipovica, si dhe afaristin Ridvan Muharremin, nën dyshimet se kanë bërë keqpërdorime sa u përket blerjeve të rezervave shtetërore.
Sipas Prokurorisë Speciale, të arrestuarit dyshohen për veprat penale “keqpërdorim i detyrës zyrtare” dhe “dhënie e ndihmës në kryerjen e veprës penale të keqpërdorimit të detyrës zyrtare”. Tre të arrestuarve iu është caktuar edhe masa a mbajtjes për 48 orë.
MINT bëri të ditur se janë kontrolluar zyrat e dy zyrtarëve të saj, si dhe është cekur se ka pasur bastisje edhe në disa ambiente dhe sekuestrim të provave materiale.
Tutje në reagimin e MINT-it thuhet se ministria mirëpret çdo hetim për rastin e blerjes së rezervës shtetërore.
“Ministria e Industrisë, Ndërmarrësisë dhe Tregtisë mirëpret çdo hetim për rastin e blerjes së rezervës shtetërore, anipse ne jemi të bindur që furnizimet dhe rezerva shtetërore janë në përputhje me ligjet përkatëse, planin përkatës dhe asnjë dëm apo dëmtim nuk ka ndodhur me to”, u tha në reagimin e MINT-it./teve1.info/
