Benjamin Haddad, ministër i Deleguar për Evropën nga Republika e Francës, ka thënë se vendi i tij do ta mbështesë Kosovën në anëtarësimin në BE dhe organizata ndërkombëtare, por ka thënë se ky proces kërkon përkushtim dhe se Franca do të jetë kërkuese.
Ai ka përmendur zbatimin e Marrëveshjes së Brukselit, sundimin e ligjit dhe respektimin e pakicave si kushte që Kosova duhet t’i plotësojë për rrugën përpara.
“Mbështesim integrimin e Kosovës në institucionet ndërkombëtare, kjo është pjesë e zgjeruar e projektit tonë, e bashkimit të Evropës, nuk dua të them, zgjerim sepse ne synojmë bashkimin e kontinentit. Natyrisht, ky proces është kërkues dhe kërkon përkushtime ndërkombëtare dhe bazohet edhe në zbatimin e përkushtimit në Marrëveshjen e Brukselit, reformat integrimi, sundimi i ligjit, respektimi i pakicave dhe do të jemi kërkues. Do të jemi me Kosovën”, ka thënë ai në konferencën e përbashkët për media me ministrin në detyrë të Punëve të Jashtme, Glauk Konjufca.
Haddad i cili po qëndron në Prishtinë ku ka nënshkruar pesë marrëveshje me Konjufcën, ka thënë se qëndrimi i tij këtu, është për të konfirmuar miqësinë mes dy vendeve./teve1.info/
