Të paktën dhjetë spitale dhe klinika në Rripin e Gazës u goditën nga sulmet izraelite javën e kaluar, duke shkaktuar mbyllje të plotë ose të pjesshme të shërbimeve dhe duke mbingarkuar objektet e mbetura të kujdesit shëndetësor, raportoi gazeta Haaretz, transmeton Anadolu.
Sulmi ndaj Spitalit Evropian në Khan Younis shënoi fillimin e operacionit të intensifikuar tokësor të Izraelit, i njohur si operacioni “Gideon Chariots”, i cili u miratua nga Kabineti i Sigurisë Izraelite më 4 maj dhe filloi më 18 maj, sipas të përditshmes izraelite.
“Këto sulme rritën ndjeshëm presionin mbi sistemin shëndetësor të Gazës që po shembet”, tha ajo, duke cituar Ministrinë e Shëndetësisë të Gazës që tregoi se 400.000 njerëz tani kanë mbetur pa qasje në shërbime mjekësore.
Organizata Botërore e Shëndetësisë (OBSH) dokumentoi 28 sulme ndaj spitaleve në gjithë enklavën javën e kaluar – 4 për qind e të gjitha sulmeve ndaj spitaleve që nga fillimi i gjenocidit.
“Sulmet ushtarake në Gaza po e çojnë sistemin shëndetësor drejt rrënimit”, paralajmëroi OBSH-ja në X, duke vënë në dukje se 94 për qind e spitaleve kanë pësuar dëme të mëdha ose janë shkatërruar.
Vetëm 19 nga 36 spitalet në enklavë mbeten të paktën pjesërisht funksionale, shtoi ajo, duke nënvizuar se “spitalet nuk duhet të militarizohen ose të shënjestrohen kurrë”.
Katër spitale kryesore u detyruan të mbyllen javën e kaluar për shkak të sulmeve të përsëritura, urdhrave të evakuimit dhe luftimeve të intensifikuara.
Izraeli pretendon se luftëtarët nga grupi i rezistencës palestineze, Hamas, janë fshehur brenda spitaleve, një justifikim i përsëritur shpesh nga ushtria.
Që nga fillimi i sulmeve kundër Gazës më 7 tetor 2023, Izraeli ka goditur vazhdimisht objektet mjekësore, duke dëmtuar rëndë sistemin e kujdesit shëndetësor dhe duke rrezikuar mijëra pacientë, sipas burimeve të OKB-së dhe palestineze.
Paralelisht, Izraeli ka vendosur një bllokadë ndaj shpërndarjes së ndihmave që nga 2 marsi, duke zbatuar atë që vëzhguesit e përshkruajnë si politikë të urisë sistematike, e cila ka çuar në uri dhe vdekjen e shumë civilëve.
