E pikërisht kur në Bruksel u diskutua rreth dinarit serb, Guvernatori i Bankës Qendrore të Kosovës, Ahmet Ismaili e ka mbajtur një ligjëratë para studentëve të Fakultetit Ekonomik. Por, Ismaili nuk foli për çështjen e dinarit përkundër insistimit të medieve për këtë temë.
Është njëri nga personat më të përfolur në vend për momentin.
E pikërisht në ditën kur dinari është temë diskutimi në Bruksel mes kryenegociatorëve të Kosovës dhe Serbisë, Guvernatori i Bankës Qendrore të Kosovës erdhi për t’iu ligjëruar studentëve në Fakultetin Ekonomik të Universitetit të Prishtinës.
Interesimi i medieve ishte i madh, e duket që guvernatori, Ahmet Ismaili e dinte arsyen.
“Këta dijnë me shfrytëzu situatën, po edi thonë ka shku në Bruksel ai, kështu që..”
Megjithatë në fjalën e tij drejtuar studentëve, çështja e dinarit nuk u përmend askund.
Ai ligjëratën për Bankën Qendrore dhe rolin e saj në sistemin financiar të Republikës së Kosovës e filloi duke kujtuar se dikur ka qenë student në këtë fakultet dhe pastaj asistent.
E pastaj Guvernatori Ismaili foli për marrëveshjen e mirëkuptimit të nënshkruar me fakultetin ekonomik në kuadër të Javës Ndërkombëtare të Parasë për të avancuar bashkëpunimin dhe mbështetur aspektin akademik.
Ndërkaq, dekani i Fakultetit Ekonomik, Driton Balaj u shpreh i lumtur me prezencën e guvernatorit Ismaili.
E kur ligjërata përfundoi, guvernatori u duartrokit nga studentët në sallë.
Edhe pse nga fillimi e dinte që do të ketë interesim për çështjen e dinarit, ai refuzoi të përgjigjej.
