Shefi i OKB-së, Antonio Guterres duke folur në hapjen e mbledhjes së Asamblesë së Përgjithshme që po mbahet në Nju Jork, përmendi disa nga konfliktet më të mëdha globale, duke e nisur me luftën në Sudan dhe pushtimin e Ukrainës nga Rusia.
Megjithatë, ai vuri theksin te lufta në Gaza, e cila pritet të dominojë Debatin e Përgjithshëm të këtij viti.
“Në Gaza, tmerret po i afrohen vitit të tretë monstruoz. Ato janë rezultat i vendimeve që sfidojnë humanitetin bazik. Shkalla e vdekjes dhe shkatërrimit është përtej çdo konflikti tjetër në vitet e mia si Sekretar i Përgjithshëm”, tha ai.
Ai përmendi edhe Gjykatën Ndërkombëtare të Drejtësisë (GJND), gjykatën më të lartë të OKB-së, e cila ka lëshuar disa urdhra lidhur me Gazën, përfshirë thirrjet drejtuar Izraelit që të ndërmarrë masa për të parandaluar gjenocidin, të lejojë hetime dhe të rrisë ndihmën humanitare, citon Al Jazeera.
“Asgjë nuk mund të justifikojë sulmet e tmerrshme terroriste të Hamasit të 7 tetorit dhe marrjen e pengjeve, të cilat i kam dënuar vazhdimisht. Dhe asgjë nuk mund të justifikojë ndëshkimin kolektiv të popullit palestinez dhe shkatërrimin sistematik të Gazës”, tha ai.
“E dimë se çfarë nevojitet: Armëpushim i përhershëm tani. Të gjithë pengjet të lirohen tani. Qasje e plotë humanitare tani. Dhe nuk duhet të dorëzohemi te e vetmja përgjigje e qëndrueshme për paqe të qëndrueshme në Lindjen e Mesme: një zgjidhje me dy shtete”, tha ai.
