Kruja, episodi më dramatik: Flakët në Malin e Krujës iu afruan banesave, duke detyruar evakuimin e dy lagjeve.
Qindra forca, ushtria dhe helikopterët u angazhuan për izolimin e zjarrit.
Banesat u shpëtuan, por u dogjën sipërfaqe të mëdha pyjore. Për zjarrin u arrestua një 73-vjeçar, i dyshuar se e kishte ndezur gjatë djegies së barit.
Pas Krujës, situata u rëndua në Lurë, Dajt, Priskë të Madhe, Patos, Përmet dhe zona të tjera.
Në disa raste u përdorën helikopterë dhe avionë Air Tractor, ndërsa në Lurë operacioni u përqendrua edhe pranë banesave për të shmangur rrezikun për komunitetin.
Më 11 gusht, Arben Cara dha dorëheqjen nga drejtimi i Shërbimit Zjarrfikës, shkruan tvklan.
Kosova i ofron ndihmë Shqipërisë: Në kulmin e situatës, Kosova shprehu gatishmërinë për të vënë në dispozicion kapacitetet e saj për përballimin e zjarreve në Shqipëri dhe Mal të Zi.
Zjarret kanë shoqëruar Shqipërinë gjatë gjithë gushtit, me situata të përsëritura veçanërisht në Krujë, Lurë dhe zonat periferike të Tiranës.
Bilanci i fundit i Ministrisë së Mbrojtjes flet për 13 vatra zjarri, 10 prej tyre aktive.
Në Lurë situata mbetet më e vështirë, ndërsa në Krujë vijon ndërhyrja për shuarjen e plotë të vatrave.
Forcat në terren dhe ndërhyrja nga ajri po vijojnë për të mbajtur nën kontroll flakët.
