Deputeti i LDK-së, Paris Guri ka komentuar zhvillimet e fundit politike në vend në lidhje me konstituimin e Kuvendit dhe zgjedhjen për president të Kosovës, duke thënë që LVV nuk ishte e interesuar për një partneritet me LDK-në.
Ai theksoi se LDK nuk ka qenë asnjëherë e interesuar për pozita qeveritare e as për pozitën e kryetarit të Kuvendit të Kosovës.
Sipas Gurit, partia e tij ka qenë e interesuar për zhbllokimin e krizës institucionale të vendit, duke shtuar se LDK do ta jap kontributin e saj për zgjedhjen e presidentit.
“Kur e pamë që ata nuk janë të interesuar ta kenë partner LDK-në, po e përdorin si një alibi që mos të ketë institucione mos të konstituohet Kuvendi me pretekstin dhe me arsyen se ne jemi duke negociuar me LDK-në edhe për me heq këtë dyshim ne dolëm edhe thamë që në rregull, ne nuk jemi të interesuar për pozita qeveritare e as për pozitën e kryetarit ose të kryetares së Kuvendit, mirëpo ne interesin e kemi ta zhbllokojmë këtë situatë e cila është krijuar, nuk ka më asnjë arsye që të prolongohet procesi i konstituimit të Kuvendit për arsye se tashmë janë krijuar të gjitha kushtet që të zgjidhet kryetari i Kuvendit me nënkryetarët që i bie të konstituohet Kuvendi, pastaj Qeveria dhe LDK do të japë kontributin e saj për zgjedhjen e presidentit ku LDK ka hequr dorë edhe nga pozita e presidentit edhe ka thënë që ne votojmë një president i cili e donë Republikën e Kosovës, punon për të mirën e Kosovës dhe punon për Kushtetutën e vendit”, ka deklaruar Guri në emisionin “Ditari” në Tëvë1.
Guri shtoi se që nga dita e djeshme, nuk ekziston më asnjë arsye që Kuvendi i Kosovës të mos konstituohet dhe të mos krijohen institucionet qeveritare, duke i hapur kështu rrugë zgjedhjes së presidentes së Kosovës.
“Nga mbrëmja e ditës së djeshme nuk ekziston më asnjë arsye që Kuvendi të mos konstituohet, të mos krijohen institucionet qeveritare që t’i hapet rrugë zgjedhjes së presidentes së Kosovës, natyrisht që LDK edhe kësaj here e zhbllokoj situatën politike në Kosovë për arsye që tashmë po besoj që është e ditur që LDK kurrë s’ka qenë e interesuar për pushtet, mirëpo ka qenë e interesuar për shtet”, shtoi Guri./teve1.info/
