Deputeti i Lidhjes Demokratike të Kosovës Paris Guri, ka reaguar pas tensioneve të sotme në seancën e Kuvendit të Kosovës, ku ai pretendon se është penguar të flasë nga deputetët e Lëvizjes Vetëvendosje duke u përballur me ofendime dhe bullizim lidhur me moshën e tij të re.
Në emisionin “Ditari” në Tëvë1, Guri deklaroi se përplasja e tij nuk ka qenë me ndonjë deputet individualisht, por me të gjithë grupin parlamentar të LVV-së të cilët sipas tij, tentuan t’i mohonin të drejtën e fjalës në foltoren e Kuvendit.
“Që nga momenti kur u ngrita nga karrigia, filloi një zhurmë dhe britma nga ana e deputetëve të Vetëvendosjes. Ishte e çuditshme mënyra si u munduan të më ndalin. Ka pasur edhe fyerje dhe bullizim për shkak të moshës sime,” ka thënë Guri.
Ai theksoi se shumë nga komentet që iu drejtuan kishin për qëllim të nënvlerësonin moshën e tij dhe kapacitetin për të marrë fjalën, gjë që e ka cilësuar si shqetësuese dhe antidemokratike.
“Shumica e fjalëve ishin fyese. Më thonin se jam shumë i ri për të marrë fjalën në Kuvend, që për mua është shumë shqetësuese, por edhe demotivuese për të rinjtë që e ndjekin jetën parlamentare,” shtoi ai.
Tutje ai poshtu ka theksuar se për të sot ka qenë shumë e vështirë që të mbaj fjalimin e tij në Kuvend nga sjelljet e LVV-së
Ky reagim vjen në një periudhë të tensionuar politike, ku Kuvendi ka dështuar për herë të 44-të radhazi të konstituohet, me përplasje të vazhdueshme mes partive.
