Kreu i OVL-UÇK-së, Hysni Gucati, ka bërë të ditur se nesër pritet një marshim masiv në Hagë në mbështetje të ish-krerëve të Ushtrisë Çlirimtare të Kosovës dhe kundër Gjykatës Speciale.
Gucati drejtpërdrejt nga Haga ka bërë të ditur se numri i shqiptarëve që do të protestojnë nesër është masiv.
“Kanë ardhë shumë shqiptarë me flamuj kuq e zi, edhe sot kanë marshuar rrugëve. Unë shpresoj që nesër gjithë shqiptaria, jo vetëm Kosova do të marshojnë në Hagë. Janë nisur të vijnë autobusë nga Kosova, Maqedonia prej Preshevës, prej shtetit amë nga Shqipëria, sot kanë ardhë edhe prej Anglisë. Hoteli është full nuk ka më vende të lira. Ka plotë shqiptarë që kanë mbetur duke kërkuar hotele, janë dalë edhe jashtë këtij qyteti. Nesër rrugët do të mbushen me flamuj të UÇK-së e me flamuj kombëtar”, tha Gucati për Tëvë1.
Gucati tha se shqiptarët po protestojnë kundër punës dhe veprimeve që po ndërmerr Gjykata, jo kundër individëve të caktuar.
“Gjykata Speciale nuk ka pasur reagim. Ata e di që nuk e presin mirë, sepse po dihet që ne po dalim kundër tyre. Por ne po protestojmë kundër punës së tyre, jo kundër ndonjë individi. Për herë të parë shumë bashkëluftëtar do të vijnë nesër, për shkak se s’kanë pasur mundësi më herët të vijnë t’i vizitojnë. Nesër do të jetë një përkrahje e mbështetje e madhe për të gjithë ata që janë brenda. Zëri ynë do të shkojë aty ku është vendi – ne do t’i tregojmë Gjykatës dhe të gjithëve mu nga zemra e Evropës që Gjykata Speciale është e padrejtë, s’ka drejtësi fare”, deklaroi ai.
Gucati theksoi gjithashtu pjesëmarrjen e familjarëve me fëmijë, duke vënë në pah përkrahjen e madhe që pritet nesër.
