Grupi irakian paramilitar, Kataib Hezbollah, ka paralajmëruar për një “luftë totale” në rast se sulmohet Irani, duke dhënë sinjal se do të mbështeste ushtarakisht Teheranin në rast se shpërthen ndonjë konflikt.
Kjo vjen pas njoftimeve se Shtetet e Bashkuara po grumbullojnë asete ushtarake në regjion.
Shefi i grupit që ka mbështetje nga Irani, Abu Hussein al‑Hamidaëi, lëshoi deklaratën të dielën, duke u bërë thirrje luftëtarëve që të përgatiten për luftë.
Ai tha se “forcat e errësirës” janë duke u mbledhur për të nënshtruar dhe shkatërruar Iranin, duke e përshkruar vendin si “kështjellë dhe krenari” e muslimanëve.
“Ne u themi armiqve se lufta ndaj Republikës Islamike nuk do të jetë një shëtitje në park”, tha al-Hamidawi, citon Al Jazeera.
“Por përkundrazi, do të shijoni format më të hidhura të vdekjes dhe asgjë nuk do të mbetet prej jush në rajonin tonë.”
Kur Izraeli dhe SHBA-të sulmuan Iranin në qershor të vitit të kaluar, aleatët e tij rajonalë – të njohur si “boshti i rezistencës”, që përfshin Hezbollahun në Liban dhe grupet e armatosura irakiane – nuk i erdhën në ndihmë.
Por al-Hamidawi sugjeroi që këtë herë do të ishte ndryshe, duke theksuar “domosdoshmërinë e mbështetjes së saj nga forcat e boshtit dhe të ndihmës së saj në çfarëdo mënyre që të munden”.
Kataib Hezbollah është një nga grupet më të mëdha brenda Forcave të Mobilizimit Popullor (PMF), të themeluara në vitin 2014 për të ndaluar përparimet e shpejta të ISIS-it (ISIS) në atë kohë.
Në një telefonatë me kryeministrin irakian Mohammed Shia al-Sudani të dielën, Sekretari i Shtetit i SHBA-së Marco Rubio i kërkoi Bagdadit të mbajë distancë nga Irani.
Administrata amerikane ka vazhduar të dërgojë një grup sulmues aeroplanmbajtësesh në Lindjen e Mesme, duke rritur praninë e saj ushtarake në Gjirin Persik.
Ditët e fundit, disa linja ajrore kanë pezulluar fluturimet në të gjithë rajonin, përfshirë edhe drejt Izraelit, për shkak të mundësisë së përshkallëzimit të situatës.
Teherani është zotuar të mbrohet nga çdo sulm.
