Izraeli mund të ketë kryer krime lufte dhe krime kundër njerëzimit kur dëboi me forcë 32,000 palestinezë nga tre kampe refugjatësh në Bregun Perëndimor në fillim të këtij viti gjatë një operacioni ushtarak në zonë, tha të enjten një grup i të drejtave të njeriut.
Organizata Human Rights Watch tha në një raport se zyrtarët e lartë izraelitë, përfshirë kryeministrin Benjamin Netanyahu, ministrin e Financave Bezalel Smotrich dhe ministrin e Mbrojtjes Israel Katz, duhet të hetohen për krime lufte dhe të ndiqen penalisht nëse gjenden përgjegjës, citon Associated Press.
Ndërsa pjesa më e madhe e botës u përqendrua në luftën e Izraelit në Gaza , ushtria izraelite bastisi kampet e refugjatëve në veri të Bregut Perëndimor dhe dëboi dhjetëra mijëra palestinezë nga shtëpitë e tyre në janar dhe shkurt.
Kjo përbën zhvendosjen më të madhe ndonjëherë në territor që kur Izraeli e pushtoi atë në luftën e Lindjes së Mesme të vitit 1967.
Izraeli ka thënë se trupat do të qëndrojnë në disa kampe për një vit. Nuk është e qartë se kur, nëse ndonjëherë, palestinezët do të jenë në gjendje të kthehen. Ndërkohë, mijëra palestinezë po jetojnë me të afërmit ose po ngjeshen në apartamente me qira, ndërsa të varfërit kërkojnë strehim në ndërtesa publike.
“Me vëmendjen globale të përqendruar në Gaza, forcat izraelite kanë kryer krime lufte, krime kundër njerëzimit dhe spastrim etnik në Bregun Perëndimor, të cilat duhet të hetohen dhe ndiqen penalisht”, tha Nadia Hardman, studiuese e lartë për të drejtat e refugjatëve dhe migrantëve në Human Rights Watch.
