Deputeti i Partisë Demokratike të Kosovës, Përparim Gruda, ka kritikuar kryeministrin Albin Kurti, duke e akuzuar se po e çon vendin drejt zgjedhjeve të reja për shkak të, siç tha ai, “arsyeve dhe inateve personale”.
Gruda ka thënë se Kurti nuk e ka shfrytëzuar periudhën shtesë të dhënë nga Gjykata Kushtetuese për të arritur marrëveshje politike, duke përmendur edhe vizitat e tij jashtë vendit gjatë kësaj kohe.
Sipas tij, në vend të zgjidhjes së ngërçit politik, janë humbur javë të tëra pa përpjekje serioze për kompromis mes partive.
“Albin Kurti, po të mos donte zgjedhje, siç deklaroi sot, nuk do ta shpërdoronte as mundësinë e dytë që ia dha Gjykata Kushtetuese, 34 ditë shtesë”, ka deklaruar Gruda.
Ai ka shtuar se deklaratat politike nuk kanë më peshë, pasi sipas tij veprimet e deritanishme kanë treguar mungesë vullneti për zgjidhje të qëndrueshme.
Gruda ka theksuar gjithashtu se qytetarët, sipas tij, do të reagojnë ndaj këtij zhvillimi në proceset e ardhshme zgjedhore. /teve1.info/
