Deputeti i Partisë Demokratike të Kosovës (PDK), Përparim Gruda, ka kritikuar ashpër kryesuesin e seancës konstituive të Kuvendit, Avni Dehari, duke e akuzuar se ka interpretuar në mënyrë të njëanshme dhe të cunguar aktgjykimin e fundit të Gjykatës Kushtetuese.
Gruda tha se Dehari, në një postim në Facebook, nuk pati guximin ta lexonte të plotë vendimin e Kushtetueses, duke lënë jashtë një pjesë të rëndësishme që sipas tij thekson domosdoshmërinë e përputhjes me praktikat e mëparshme parlamentare.
“Dehari e pranon një të vërtetë të qartë nga aktgjykimi, por nuk e lexon atë deri në fund. Ai injoron me vetëdije një paragraf kyç që e ndalon ndryshimin e mënyrës së votimit,” tha Gruda.
Deputeti i PDK-së i referohet pikës 187 të aktgjykimit, ku thuhet se “zhvillimi dhe përfundimi i Seancës Konstituive duhet të udhëhiqet në pajtim me përcaktimet kushtetuese për konstituimin e Kuvendit, Kreun IV të Rregullores së Kuvendit dhe praktikat e deritanishme parlamentare.”
Në këtë kuadër, Gruda theksoi se praktika e deritanishme ka qenë gjithmonë votimi i hapur dhe se çdo tentativë për të futur votim të fshehtë në këtë fazë bie ndesh me aktgjykimin e Kushtetueses.
“Avni Dehari nuk ka të drejtë të hedhë në votim propozimin për Komision për votim të fshehtë, sepse kjo shkel drejtpërdrejt këtë paragraf të aktgjykimit kushtetues,” përfundoi Gruda.
