Zëvendëskryeministri i Maqedonisë së Veriut, Artan Grubi ka mirëpritur dakordimin e Kosovës dhe Serbisë për planin e propozuar nga BE-ja për normalizim të raporteve mes dy vendeve.
Ai ka thënë se Maqedonia Veriore mirëpret liderët e dy vendëve më 18 mars datë e cila është përmendur si mundësi për takimin e radhës e Shkupit si vend nikoqir, për nënshkrimin e dakordimit të së hënës.
Grubi në Facebook ka shkruar se është koha të mbyllen armiqësitë dhe të ecët së bashku drejt Evropës.
“Nuk mund të cilësohet ndryshe përveç se një hap me rëndësi jetike për stabilitetin e mbarë rajonit , dakordimi i dyanshëm rreth përmbajtjes së propozimit franko – gjerman për normalizimin e marrëdhënieve mes Kosovës dhe Serbisë. Përgëzoj palët për largpamësinë dhe racionalitetin e treguar përtej dallimeve dhe impaktin e jashtëzakonshëm konstruktiv të dhe për ardhmërinë europiane të mbarë Ballkanit Perëndimor. Është koha të mbyllim armiqësitë dhe së bashku të hapërojmë drejt Europës dhe të shkruajmë kapitullin e ri të progresit. Shkupi do të mirëpresë krahëhapur më 18 mars liderët e të dyja vendeve dhe vazhdimin e dialogut deri në finalizimin e tij me epilog njohjen e ndërsjellët”, ka shkruar ai.
BE ka njoftuar se të hënën palët janë pajtuar për planin e propozuar nga BE, por që nuk është nënshkruar. Kjo sipas kryeministrit Kurti nuk ka ndodhur pasi presidenti serb nuk ishte i gatshëm për një gjë të tillë./teve1.info/
